18 mart 2021-ci il tarixdə Qusar rayon Heydər Əliyev Mərkəzində  “Milli-mənəvi dəyərlərə sadiq Qalib Azərbaycan” mövzusunda vebinar keçirilmişdir. Onlayn tədbiri giriş sözü ilə Mərkəzin direktoru Neva Abdurahmanova açaraq, respublikamızın ərazi bütövlüyü uğrunda canlarını qurban vermiş şəhidlərimizin əziz xatirəsini yad etmişdir. O, çıxışında milli-mənəvi dəyərlərin xalqın kimliyinin formalaşmasında  əsas faktorlardan biri olduğunu vurğulayaraq, Ümummilli  Lider Heydər Əliyevin əsasını qoyduğu  siyasətin davamı olaraq Prezident İlham Əliyevin  milli-mənəvi dəyərlərimizin qorunub saxlanılması, təbliğ və təşviq edilməsini daim diqqət mərkəzində saxladığını qeyd etmişdir.  44 günlük Vətən müharibəsi nəticəsində işğaldan azad olunmuş  doğma torpaqlarımızda aparılan quruculuq işləri ilə yanaşı  maddi və mənəvi irsin dirçəlişinin vacib əhəmiyyət daşıdığını, Qarabağ mədəniyyətinin, bölgəyə xas tarixi abidələrinin  maddi və mənəvi irsin bərpası işlərinin  ölkə başçısı tərəfindən diqqətdə saxlanıldığını  vurğulamışdır.

 “Heydər Əliyev və mili-mənəvi dəyərlər” mövzusunda çıxış edən  Qusar rayon Heydər Əliyev Mərkəzinin əməkdaşı  Lamiyə Abdullayeva  Azərbaycançılıq ideologiyasının banisi Heydər Əliyevin respublikamızda  multikultural və tolerant  mühütin qorunmasındakı  xidmətlərindən  söz açmışdır.

“ Milli adətlərimizin mənəvi yaddaşımızdakı yeri” adlı mövzu ilə  Qusar Tarix-Diyarşünaslıq Muzeyinin direktoru Xatirə Nağıbəyova çıxış edərək  Novruz bayramının xalqın təfəkküründəki  fəlsəfi düşüncələr toplusu kimi  ən qədim  el bayramı olaraq tarix boyu qadağa və təqiblərə məruz qalmasına baxmayaraq  öz gözəlliyini indi də saxladığını və dövlətimiz tərəfindən milli bayram kimi qəbul edildiyini söylədi.

Qusar şəhər 5 saylı tam orta məktəbin tarix fənni üzrə müəllimi  Gülçin Muradova  “ Tarixi zəfər və mənəvi dəyərlər”  adlı məruzəsində  Ölkə başçısı cənab İlham Əliyevin, respublikanın birinci vitse-prezidenti Mehriban Əliyevanın işğaldan azad edilən torpaqlara səfərlərinin mənəvi cəhətdən dünyaya bir mesaj olduğunu, ziyarət olunmuş məscidlərin, habelə, alban kilsəsinin və digər tarixi abidələrin  xalqımızın maddi və mənəvi irsinin göstəricisi kimi bərpasının dövlətimiz tərəfindən diqqətdə saxlanıldığını  qeyd etmişdir.

Mərkəzin könüllüsü  Xəzər universitetinin tələbəsi  Günel   Ağabəyova   “Vətən sevgisi, Qələbə sevinci” mövzusundakı  çıxışında böyük qələbəni bizə bəxş edən  yüzlərlə  şəhidimizin xatirəsinə hörmət olaraq gənclərimizi   milli adətlərimizi, mənəvi dəyərlərimizi, işğaldan azad edilmiş torpaqlarımızın tarixi və  mədəniyyətini   təbliğ etməyə dəvət etmişdir.

  Onlayn tədbirə dəvət almış  iştirakçılar mövzu ilə bağlı müxtəlif fikirlər səsləndirərək  milli-mənəvi dəyərlərin inkişafının əsasında varislik prinsipinin dayandığını, onun vasitəsilə tarixi-mənəvi irsin gələcək nəsillərə çatdırılmasının mümkün olduğunu bildirdilər.